Penumbras de Mouros e Deusas

Penumbras de Mouros e Deusas

Teño pra mín que as nosas Rías son lugar elixido polos Deuses pra nos deslumbrar con abrentes e solpores que, xunta outros fenómenos meteorolóxicos, conforman un belo álbume de, en bastantes casos, alucinantes imaxes, evocadoras unhas veces de terribles presaxios e outras tantas de positivas revelacións.

Para mostra, deixo deseguido a miña particular escolma:

(Click na foto para amplilar)

1
Ésta foto é de Setembro do 2013. Pode parecer sombría pero acho que moi bela. Lembro que nese ano repetíronse éste tipo de solpores, cuns fortes tons violáceos que non creo ter visto con posterioridade ata a data de hoxe. Semella bastante o tipo de Auroras boreais que se teñen narrado hai moitos anos, que moi raramente se producen por éstas latitudes, aínda que naqueles días non se falou de nada disto...

2
Agosto do 2016. Inquedante e espectacular imaxe dun tupido manto de nubes baixando dos altos do Barbanza ameazando cubrir coma aquel Anxo exterminador ás poboacións do Norte da Ría de Arousa. Acontece moi poucas veces no ano, alomenos de xeito tan aparatoso, así que ése foi o meu día de sorte, por collerme coa cámara na man.

3
Outubro 2017. Foto dirixida ó Norte con éste fermoso Abrente onde os Cirros son deslumbrados polo Sol saínte proporcionándolles éses fastuosos tons áureos.

4
Febreiro 2018. Un día limpo dos que adoitan ofrecer postas de intensos tons, que neste caso tampouco defraudou. A foto foi tomada dende a Punta de Quilma, coincidindo o encuadre por casalidade có que semella a repressiva mirada dalgún enfadado Deus Galaico que quixo manifestarse de xeito mais evidente que cun simple solpor invernal.

5
Outubro 2018. Outra inquedante imaxe do Ceo, nunha tarde do Outono preludio da chegada do furacán "Leslie", que deixou bastantes estragos por Portugal, e que cando chegou á Ría esa noite, xa viña moito mais amansadiño, por sorte pra nós...

6
Novembro 2017. Tomada dende o mirador do Monte Lobeira, coincidindo có que eu chamaría un clásico Solpor nun claro día de Outono, coa nosa Illa deitada no medio da Ría, seguramente desfrutando da magnífica vista, e a cuxa maxestuosidade tamén contribúe sumando a súa estirada forma...

7
Novembro 2018. Grazas a ésas nubes tralas que se iba agochando "Lourenzo" por alén Sálvora, as cales, minguando a súa intensa luz, permitiron rexistrar a nídia circunferencia nesta toma aproveitando os escasos intres xusto antes de se ocultar, logrando así cunha boa dose de sorte ésta evocadora composición á que tamén casualmente se animaron a sumarse dúas Gabotas enriquecerndo aínda mais a composición da imaxe.

8
Xaneiro 2019. Ésa impoluta tardiña có mar coma un prato no Primeiro de Ano, agasallounos dende Punta Barbafeita con éste Solpor, tendo de referente o altivo e esbelto Faro de Rúa, e a pesar désas atravesadas bateas de imposible elusión, aínda que si o queremos mirar con compracencia, non desmerecen pra nada o fermoso conxunto.

Bóh, tamén enchen o plano...

9
Febreiro 2012. Eiquí outra bela imaxe de reflexos nos Cirros. A diferencia con respeito á número 3 é que nesta imaxe estamos retratando un Solpor, nesa época do ano, dende Carreirón contra a Serra do Barbanza

Chegamos ó remate, mais non sen antes facer un chamado por si algún experto coñece as circunstancias naturais que dan orixe a estes belos fenómenos, e quer partillar unha axeitada explicación, agradeceríallo moitísimo, có ánimo de ir completando o álbume dun xeito si acaso mais académico...