x
MOI AGRADECIDO DA VISITA !! Agardo que gostes do contido

Virapedras ó rebusquiño


Virapedras - Vuelvepiedras - Turnstone
(Arenaria interpres)

Éstas bonitiñas aves limícolas espállanse por todo o mundo... Agás a Antártida, visitan as costas de tódolos continentes habitados. Aves migratorias, no caso da Arousa son invernantes, pois veñen pasa-lo inverno ás nosas costas procedentes dos lugares de cría, nomeadamente Islandia e Escandinavia.



Poderíamos considerar as nosas latitudes coma unha "estación de paso", pois dende os seus lugares de cría arrente do Círculo Polar, e nomeadamente Islandia ou Escandinavia, chegan a migrar ate Sudáfrica. Os exemplares da zona Americana son capaces de aterrar en Tierra del Fuego, e os Asiáticos acadan Oceanía nas súas migracións.


Ata 25cm de longo, medio metro de envergadura e aproximadamente 110 gramos son as súas medidas para o traxe. Aliméntanse de miñocas, insectos e pequenos crustáceos que acadan remenxendo por baixo das algas, pequenas pedras, etc., Non por casualidade teñen o nome que teñen.



Coma moitas aves, a plumaxe varía segundo toque vestir o uniforme de cada estación acorde có "estado emocional", ou a situación familiar, según estean facendo as beiras en fase de emparellamento ou directamente criando.


Haille que recoñecer que son unhas aves que non sempre che fuxen, depende do humor có que as collas. Cando se están a alimentar adoitan facelo en grupiños non moi grandes, eu diría que sobre uns vinte individuos, mostrándose moi activos remenxendo todo o que atopan, e as veces competindo entre eles, polo que xa os teño acadado en diversas oportunidades, deixándome aproximar ate uns 4 ou 5 metros.


O resto do tempo agás os viaxes migratorios ou cando se alimentan, (o tempo libre) amósanse bastante menos gregarios, podéndose ver moitas veces nos Cóns algúns exemplares solitarios facendo o longuis, no medio de outras especies coma Píllaras, Pilros, Biluricos... 



Supoño que agardan a baixada do mar, aproveitando a mornura que proporciona o grupiño formado polas especies da competencia, pra ir á Seca a mariscar remenxendo ó "rebusquiño"...


Ningún comentario:

Publicar un comentario

Agradezo tódolos comentarios, só pido sentidiño